الناس السمحه

الشاعر ربيع الزعابي

في ناس سمحة وجه ونْفوسها صْغار
تقبل عليك بْنَفس تنسى همومك
واللي ثقيله تزيّدك هَم وامرار
تْشوفها .. تكره إذا كان يومك
واللي مابين وبين لا نور .. لا نار
تحتار فيها تْحَشمْ ولاّ تلومك
هذه الحقيقه عيشها كيف ماصار
الناس تَفرق والبقايا علومك
حي الرفيق المخلص الطيّب البار
من خيره فْ ناسه فخيره يحومك
نفسٍ صغيره ماحوَت ذرة كْبار
يشريك دوم ولا بيومٍ يسومك
لا ضاقت اللحظه على دربك امرار
يسهر عليك يْعدْ عنّك نْجومك
ماتْهمّه الدنيا والاموال الْكْثار
يسندك لا منها تهاوت عزومك