عندي بحور الشعر موج طامي
عن لسان الآباء والأجداد قبيلة زعاب في زمن الغوص والماضي الجميل
الشاعر / أنور بن حمدان الزعابي
حي النديب وحي منهو مرسله
حي الهديه يانسل لآحشامي
عد الكواكب والنجوم الساريه
وعد الليالي ودورة ألايامي
عندي المزامل بالمعاني راهيه
وعندي يحور الشعر موج ن ، طامي
والشعر من فكري وضميري أفتله
ويجود لي كالوابل الركامي
قول الفصاحه والبلاغه يحمله
ويجدي المعنى على الفهامي
ولا الغبي يلي يحوث المسأله
جاهل بمعنايه ولا ينلامي
والفكر واسع مول ماشي معظله
ويعلم مداه الواحد العلامي
ومن عقب هذا يانديبي شلله
قول الشعر من خاطر ن متسامي
تقديرن وترحيب مني يوصله
لسيف بن عيسى ابن قطامي
حي الخوي راعي المعاني الفاضله
شهم ن حشيم ن من نسل لآكرامي
وياحي بوعيسى وحي امقابله
وياحي شوفه ع مدار العامي
كلنا بني عم ن ولا به كامله
وكلنا أهل من جملة ألارحامي
زعاب حنا والمواقف ماثله
وألنا تواريخ وعصور أجدامي
أجدادنا خاضوا معارك هائله
وأصغيرهم كالفارس المقدامي
يوم العصور الماضيات الافله
راياتنا حمراء على لولامي
فوق الحصون الشامخات الباسله
وفوق اليزيره ركزوا لاعلامي
والبحر يشهد والخليج وساحله
سنيارهم للغوص والازحامي
أربع شهورن هي عليهم كامله
والبحر عاتي بموجه اللطامي
هاذي الشجاعه والرجال الصامله
وكل واحد ن فيهم أسد ضرغامي
وفي البر والمزرع حياة حافله
هم أسكنوه وطنبوا لآخيامي
عندهم خيار الهين لي متأصله
وأركابهم بأغلى الثمن تنسامي
وأزمولهم شلن حمول ن مثقله
تقطع فيافي البيد والآكامي
وأمقيضهم في خت ذكرى ماثله
وأنخيلهم نعمه من ألانعامي
والعين والمسكر وماي أنقاله
تشفي عليل الحال م ألاسقامي
ولا الليسيلي لي أنهرق مسياله
مايه زلال ن يرتويبه الضامي
والسيح لي دون الجري وأرماله
عليه هملول المطر ركامي
صورت م التاريخ حقبه راحله
مرت وزلت من عصور أجدامي
هذا تراث ، نذكره ونذكر هله
من ماضي ألازمان وألايامي
ولاينكر التاريخ ألاجـاهله
ومن يجهل التاريخ هو متعامي
وانا على هذا ضربت ألامثله
وأسوق معنايه على الفهامي
على الكرام أهل المعاني الفاضله
لي قدرهم عندي كبير وســـامي
الشمس تسطع والحقيقه ماثله
ولا يغطي الشمس الردي بأوهامي
ذيك الثريا لي بفضاها شاعله
أما الثرى ينداس بأ لآقــــــدامي .
محسوبه الدنيا وفيها أمعـــــادله
وأحسب معــــــانيها مع ألايامي
هذا بما كد جاد فكري وسجله
نابع من أحساسي وروس أقلامي
خضنا بحور الشعر بألف أمساجله
شعر ن موثق من صميم ألهامي
وأنا بدعته في رسـاله عاجله
يوصل الى الخيرين وألاكرامي
ولا النذل مابحسبه في أمعادله
الخايب اللي ماعليه أمرامي
وأختمت جيلي في مقاله كامله
تغتر على الجهـال والغشامي
فوق الثريا في محلها جازله
منسوجة ن أبياتها بحكامي
