خبر شين

الشاعر / ناجي الصقار

البارحة بالليل اجاني خبر شين
وحسيتـني عايش بدنيا حقيره
يالله لا تفجعني بمهجة العين
لي مدةٍ خايف وعيني سهيره

قالوا لي امك بين حيّه وما بين
تبغا تشوفك لو لمره أخيره
على النبي صلًت ألوف وملايين
تدعي الى الله لاجلك وتستخيره

تسأل عليك بكل حزّه وذا الحين
حتى الليالي والضحى والظهيره
بين القرايب والأهل والمحبين
هلّت عليك من الدموع الغزيره

متى عليها ترجع تحنً وتلين
اليوم حالتها على الله وخطيره
تحسب لك الأيام وشهور وسنين
وصارت بتعداد الليالي خبيره

قولو لها تحسب وكلّي لها دين
ذاقت من فراقي ليالي مريره
ثارت بي الأشواق مثل البراكين
وضاقت بي الدنيا ولو هي كبيره

قالوا لي الحق شوفها ربك معين
وإذعن لأمر الله عسى فيه خيره
ما طوّل ودمي وقف بالشرايين
كالمذنب الي ما يحاسب ضميره

لا يا زمن لا تمتحني بثنتين
مثلي غريب الدار من هو نصيره
يا من أذيت وفرّقت بين قلبين
كل واحدٍ فينا يواجه مصيره

هذا قدرنا نفترق بين نارين
أمي بديرتنا وانا بغير ديره
اخذوا لها قلبي قطعته بسكين
تامر على قلبي تِدلل أميره

ولا تفجعوني في خبر ما هو بزين
ولا تذبحوني بالسيوف الشطيره
لو راحت امي راحت الروح بعدين
من بعدها لوعشت ما لي جبيره

لا تذبحوا قلبي ترى القلب مسكين
من يذكر امي يرتمي في سريره
يا رب انا في ساعة العسر واللين
ملجاي الك يا عالمٍ بالسريره